للجمال ( اخبار ) وإنتي موجزه ..!!

1 06-01-2023, 03:58 AM

ماهي .. ( قصة حب ) ولا ذكريات
لك مشاعر ( جيش ) .. وقلبي مركزه
صرتي لي " خامس جهه " لأربع جهات !
وصورتك في وسط عيني ( مبروزه )
كن ربي ماخلق غيرك بنات !!
إن طروا غيرك .. احس " بنرفزه "
وكنك إنتي جامعه .. كل الصفات !
الحلا ...
والزين ...
وعين ( مطرزه )
جاك قلبي وصرت عاشق تضحيات
و ( الهدف ) من شان " عينك " احرزه
إن خلطتي الماي في " سكر نبات "
وقلتي " افرزه " !!
راح أفرزه !!
في كلامك يستلج فيني السكات
ومن جهل طبعك يظنك ( مخرزه ) ..!!
واثق الخطوه .. وامشي في ثباات
ويوم شفتك الخطاوي ( مهزهزه ) ..!
مو بكيفي هي كذا والله جات
قلبي كرسي " صعب " غيرك يحجزه
عيشتي دونك
يساويها الممات !!
وإنتي عيشي في حياتي " معززه "
يعني قبلك .. كنت انا كلي شتات
وصرت أجمعلك شتاتي .. وأكنزه !
وشيء طبيعي لو يغارون البنات
للجمال ( أخبار ) .. وإنتي " موجزه "
ومن يشوفك .. اللي يتكلم لغات
قام يخربط وال ( إذا ) صارت ( إزه )
والثقيل اللي يسولف في سكات
من يشوفك عاش حالة لعوزه !!
ولو تبوسي إنسان له أيام مات
قام يركض !! حس قلبه ينغزه ..!
وقلبي اللي نام في عز وسبات
غيرك إنتي .. ما أظن ( يفززه )
واللي قالوا لما جات " الحلوه جات "
جنبك إنتي صارت اكبر مطنزه ..
لا تغاري من كلام المعجبات
ماني مثل اللي يحب الرزرزه
ياما قالوا ( الحب ) يصنع
معجزات ...
وإنتي
( حبك )
في حياتي
معجزه

حلا معجب بهذا

المصدر : منتديات ريم الغلا - من ~•₪• للشعر الشعبي والنبطي ~•₪•